Síðast liðna helgi fór fram á Egilsstöðum námskeið 3 á vegum Brunamálaskólans. 13 slökkviliðsmenn frá Brunavörnum á Austurlandsi sóttu námskeiðið. Fimm frá Egilsstöðum, fjórir frá Seyðisfirði, tveir frá Borgarfirði eystra og tveir frá Djúpavogi. Námskeiðið var frá föstudegi til sunnudags, alls 30 klukkustundir bæði bóklegt og verklegt. Kennarar á námskeiðinu voru Þórður Bogason og Árni Ómar Árnason frá Slökkviliði Höfuðborgarsvæðisins, ásamt Bernhard Jóhannessyni sérfræðingi hjá Mannvirkjastofnun.

Nemendur lærðu meðal annars um björgunartækni úr bifreiðum, verðmætabjörgun, vatnsöflun og ýmislegt um hnúta og notkun stiga. Hér í myndasafni er hægt að sjá nokkrar myndir frá laugardeginum þar sem nemendur tókust á við nokkur erfið úrlausnarefni.

Áður höfðu sótt þetta sama námskeið til Hafnar í Hornafirði 6 slökkviliðsmenn frá Djúpavogi en Brunavarnir á Austurlandi í samstarfið við slökkvilið Hornafjaðrar stóðu saman að því.

Útköll á árinu 2010 voru 17 hjá Brunavörnum á Austurlandi, þar af 13 eldútköll og 4 í bílslys. Ekkert útkall varð á slökkviliðið á Djúpavogi og ekki heldur á slökkviliðið á Borgarfirði. Mesta eldútkall á svæðinu varð 30 júní í Fellabakarí en kölluð voru til aðstoðar slökkviliðin á Seyðisfirði, Fjarðabyggð, Vopnafirði og einnig Björgunarsveitin Hérað.

Slökkviliðið á Egilsstöðum var kallað út 18 desember til aðstoðar vegna elds í spenni í Álverinu á Reyðarfirði. Þetta var án efa mesti eldur sem slökkvilið hafa staðið frammi fyrir á Austurlandi og mikil ógn sem af honum safaði og gat haft veruleg áhrif á þjóðarhag.

Slökkviliðsmenn á Seyðisfirði ganga í hús næstu kvöld og bjóðast til að taka við handslökkvitækjum og koma þeim á skoðunarstöð og skila þeim aftur að yfirferð lokinni.

Einnig munu þeir bjóða til sölu reykskynjara, eldvarnateppi og handslökkvitæki.